((( حكاية كورنيش ))) ...

حكاية كورنيش ..

هحكيلكوا حكاية يوم و ليله
حكايات لناس واشخاص كتير
علي كورنيش صغير في عالم كبير
وناس فيها كل الصفات
اللي عارف الصح واللي عالغلط اعتاد
وناس فقيره وناس غنيه وناس طيبه وناس شقيه وناس من كل الطبقات

وكورنيش واقف زي الجبل
بيحب الصح ومستحمل الهبل

لا حد يزعل منه ولا حد يعيب عليه
مهو كورنيش جماد
لا يقول لحد لأ ولا يقول لحد ليه

يعيني عليك يا كورنيش
ناس لها دور البطوله وانت في اخر الافيش

وحكاية اتنين حبيبه ماشيين ساعة مغربيه
بتحبها ازاي يبن الناس
مهو لو كان عندك احساس
كنت تخاف عليها من العيون المفتريه
دا الناس مبترحمش واللسان في الكلام ميه ميه

وحكايه واحد ماشي يسترزق
يبيع كانز مايه شيبسي ربك اللي يرزق
متخافش هتقضي مهو الناس عالكورنيش كتير
منهم البخيل ومنهم الامير
منهم الغني ومنهم الفقير
ربك يسهلها و المراكب الواقفه تسير

وابن بتاع الكانز بيبيع مناديل
ايه يا عم ده لسه عيل صغير؟؟
يقول دي دنيا غداره وناس بتتغير
سيبه يتعلم من الدنيا و يقلب عيشه
لو خاف الدنيا هتدوسه وتنتف ريشه

وبياعة ورد عجوزه غلبانه
عايشه مع ورد لكن طول عمرها شقيانه
ماشيه عالكورنيش تبيع للحبيبه
خد ورد يا بيه يا رب تتجوزها
يا ستي ابوها مش راضي و مش عايزني عريسها

والورد دبل والحب راح
والقلب اشتكي من كتر الجراح
وكورنيش واقف يتفرج عليهم
وبياعة الورد لسه سارحه بيهم
ورد يا بيه يا رب تتجوزها
يا ستي ماقولنا ابوها رافضني وجايبلها عريسها

وحكاية واحد فقير شحات
مش شايف قدامه لا رجاله ولا ستات
مش شايف غير الفلوس اللي هياكل بيها
لا في شبشب يلبسه ولا هدوم يشتريها

و واد ابن ناس راكب عربيه
فاتح الازاز وعيونه راحه جايه
يبص في المرايه ديه والمرايه ديه

مهو واد فاضي واقف بيتسلي
قصص قدامه وحكايات بالجمله
وابوه تعب وشقي لحد ما جاب المصنع والفيلا

جابلك عربيه وعملك قيمه
احمد ربك
مش واقف ضاربها صارمه قديمه
وراكن بتتفرج عالكورنيش ولا كانه سيما

وحكاية راجل ومراته ومعاه ولاده
زهقوا من البيت قالوا نخرج نتهوي
ده الكورنيش عالمايه والدنيا حلوه
ياكلوا ترمس ويقزقزوا لب
عيشتهم بسيطه مليانه حب
عيونهم مليانه مبيبصوش لحد
حياتهم فيها الهزار هزار والجد جد

واللي ماشي مع بنت ماسك ايديها
واللي راكن ورا شجره في حته الدنيا ضلمه فيها
واللي قاعد خايف حد يشوفه .............طب اديني شوفتك
خايف الناس تعلم عليه وتعرفه.................. اديني عرفتك

وناس ماشيه تتفرج
اللي ماشي زعلان
واللي ماشي يضحك ويهرج

وناس عاجبها الحال
وناس مش عاجبها المستحيل

وناس عال العال
وناس عايشه ميته من زمن طويل

وميكروباصات ماشيه جنب الكورنيش
سواق ماشي في حاله
وسواق نفسه ينزل ويعيش
وراكب ولا علي باله
وراكب جنبه عاوز يهيص

ورجاله وستات للبيع
طب في شرع مين ده يا بيه
لا ده ديننا ولا ده اللي اتعودنا عليه
ولا عمره كان في وطننا
ولا عمر شرع اعترف بيه

وتمشي تلاقي عربيه مركونه
فيها الشباب بيشربوا ودماغ مش موزونه
وانا اقول الحوادث اللي بتحصل دي منين
مهو الناس مسطوله والراس مفيهاش عينين

تمشي تلاقي عربيه تانيه
فيها ولد و بنت وعيش مهي دنيا فانيه

فاكرين نفسهم قاعدين لوحدهم
لأ ده فيه شيطان تالت جنبهم
قاعد يوسوس ليهم ويقولهم
اوعوا تقوموا من جنب بعض
انتو اتنين عشاق بتحبوا بعض
دي القعده حلوه وملكوش في البعد
ولا هتقدروا علي فراق ولا علي بعد

واتنين عواجيز اتخنقوا من الدنيا
ربنا جمعهم مع بعض في دنيا تانيه
مش عاوزين لا شكل ولا مظهر ولا منظر
عاوزين يعيشوا مع بعض في كل ثانيه

وناس تمشي وناس تقف
وناس تضحك وناس تبكي
وناس ماشيه في حالها
وناس مش عاجبها حالها

وكورنيش ثابت في مكانه
لا عمره زعل حد ولا عمره حد هانه

[/center]
[/size]